Kryesia e bashkësisë islame denon sulmin ndaj Ejup Krasniqit

Kryesia e Bashkësisë islame të Kosovës në mbledhjen e djeshme përpos të tjerash ka dënuar edhe sulmin ndaj bibliotekistit të FSI - së i cili njëherë kryen edhe detyrën e imamit në fshatin Makoc të komunës së Prishtinë Ejup Krasniqi.

Sulmi ndaj imamit Krasniqi është një akët kriminal i kryer nga njerëz të lig të cilët imamit i kanë kurdisur kurth me gjoja ftesën për të marrë pjesë në një ceremoni fetare.

Është përgjegjësi e imamit që të jetë i pranishëm në xhemat dhe të tu përgjigjet atyre qoftë në raste gëzimi qoftë në raste hidhërimi. Por, është krejt e pa pranueshme që dikush të gjykoj për veprimet që kanë të bëjnë me traditën islame në Kosovë.

I vetmi institucion legal e legjitim që merret me organizimin, zhvillimin dhe mbikëqyrjen e jetës fetare islame në Kosovë është Bashkësia Islame e Kosovës dhe institucionet e saja kompetente.

Tentimi për tu përzier në punët dhe kompetencat e BI -së është i papranueshëm, madje po aq i papranueshëm është edhe dhënia e fetfave nga njerëz të ndryshëm që nuk kanë as dijen e duhur e as legjitimitete e këtij populli.

Kryesia e Bashkësisë Islame të Kosovës dënon edhe njëherë fuqishëm rastin e sulmit nga Ejup Kransiqit dhe kërkon nga organet e ndjekjes që sa më parë të gjejë autorët e kësaj vepre kriminele e ti nxjerr para drejtësisë.

Dhuna, shantazhi dhe atakimi i bartësve të funksioneve të BI - së është atak edhe mbi shoqërinë kosovare dhe sulm i drejtpërdrejt në institucionet e BI-së. Andaj edhe njëherë kërkojmë që autorët e këtyre veprave të shëmtuar të zbulohen sa më parë.

Aktet e tilla për Kryesinë e BI-së janë të papranueshme dhe kërkojmë nga organet kompetente që të tilla raste ti parandalojnë duke i identifikuar shkaktarët e tyre dhe duke i vu para drejtësisë.

BIK, shkurt 2009.