Modeli që i duhet Njerëzimit
Të gjithë bashkohen se ai është njeriu që la më shumë mbresë dhe ndikim në historinë njerëzore. Mbi të gjitha një njeri i madh, një profet i denjë, një prijës sypatrembur, një diplomat i zoti, një komunikues i shkëlqyer, një paqebërës i vendosur, një falës i devotshëm, një baba shembullor, një bashkëshort i dashur!
Janë vetëm disa cilësi që parë me pasqyrën e shekullit të XXI-të, janë të gjitha cilësitë që i kërkohen një njeriu të suksesshëm sot ... sa arrijmë t'i bëjmë ne të gjitha këto (kuptohet përveç profetësisë që ishte e drejtë që Zoti ia dha vetëm atij), kjo është çështja. Askush të mos thotë se vlerat që ai la pas janë mbuluar nga mjegulla e kohës dhe pluhuri i harresës. Ende sot njerëzit kanë nevojë për njerëz besnikë, apo "Emin" siç atë e thërrisnin rrugëve të Mekës, Medinës, Jeruzalemit e Damaskut ...
Njerëzit duan paqen e jo më luftën! Dhe ai ishte paqebërësi më i madh ... ai shkoi në luftë vetëm kur u sulmua! Ai nuk sulmoi, shau, denigroi, përfoli apo ... dikë. Ai shtriu dorën për myslimanë, të krishterë, hebrenj dhe madje edhe për jobesimtarët! Ky ishte misioni i tij "Paqja", mision i cili na bie ne myslimanëve nga një copë si detyrë që ai na e ka lënë.
Njerëzit duan që të jetojnë me trimat ... dhe ai ishte i tillë! Por nuk ishte hakmarrës e jo i rrëmbyer si një lumë në vjeshtë. Ai ishte trim sepse mbi të gjitha dinte të ruante rrëmbimin e inatit dhe hasmërisë! Ishte ai që e mësoi Aliun se armiku luftohet për hir të Zotit dhe jo për hir të robit ... dhe Aliu uli shpatën kur armiku përballë e pështyu ... "të luftoj për Zotin, i tha e jo për veten time ...".
Njerëzit duan të kenë të bëjnë me diplomatë të shkëlqyer që me asnjë komb të mos kenë probleme! Dhe ai ishte një kryediplomat që edhe mbreti i krishterë Nexhashiu e priti me besim. Është ai modeli që i duhet diplomacisë botërore për të sheshuar luftën që ka plasur në Shtëpinë e Ibrahimit ...
Njerëzit duan të kenë përballë e të jenë komunikues të shkëlqyer ... dhe ai ishte i tillë! Zëri i tij, syri i tij, dora e tij dhe argumenti i tij, zbutën zemra burrash të ashpër që kishin shkuar për ta vrarë ... Ai është modeli i komunikimit që njerëzimi kërkon!
Njerëzit kanë nevojë për falje, të mos ndëshkohen për ato që bënë me hir a me pahir ... dhe ai ishte falës i madh! Ai besonte se kush fal në këtë botë, i Gjithëmëshirshmi do ta falë në botën tjetër për ato që bëri keq mbi dhé. Ai është modeli i zemërbutësisë dhe sakrificës që edhe vrasësin e komandantit të parë mysliman, Hamzait, dashuria e Allahut qoftë mbi të, e fali ...
Njerëzit duan të kenë prindër të mirë e të dashur dhe bashkëshortë idealë ... ai ishte i tillë dhe dëshmitarë janë të afërmit dhe pasuesit e tij!
Ai është o lexues durimtar i këtyre rreshtave, modeli që njerëzimi ka pasur nevojë, ai është modeli që vetë ne myslimanët ende nuk e kemi kuptuar, ai është modeli që të tjerët e kanë keqkuptuar, ai është modeli që ende ka popuj në botë që nuk e njohin ... Ai është modeli që mund ta nxjerrë këtë botë nga bataku i luftës, xhelozisë, pabesisë dhe dredhive.
Paqja dhe bekimi i Allahut, qofshin mbi Të, familjen dhe gjithë pasuesit e tij që nga dita e parë e profetësisë e deri sot!
Përgatiti: dritaislame